Jose Mourinho e ka nisur me fitore detyrën e tij si trajner te Tottenham Hotspuri.

“Spursët” kanë fituar me rezultat 2 me 3 ndeshjen si mysafirë kundër West Ham United pasditen e sotme (e shtunë) në kuadër të xhiros së 13-të në Premierë Ligë, shkruan portali arbresh.info.

Harry Kane arriti të dërgojë topin në rrjetë në fillim të pjesës së parë, por goli i sulmuesit të Anglisë u anulua pas shqyrtimit me anë të teknologjisë VAR.

Sidoqoftë, djelmoshat nën udhëheqjen e trajnerit portugez arritën të realizojnë në minutën e 36′ golin e epërsisë me anë të Heung min Son para se Lucas Moura të dyfishonte gjithçka vetëm shtatë minuta më vonë.

Kane realizoi golin e tretë në pjesën e dytë (49′) ndërkohë që nikoqirët arritën të ngushtojnë disavantazhin në 1 me 3 me anë të Michail Antonios në minutën e 74′ teksa golin tjetër për 2 me 3 e realizoi Angelo Ogbonna.

Albian Ajeti ishte në dispozicion në këtë takim vetëm nga bankina, por nuk është shfrytëzuar fare nga trajneri Manuel Pellegrini.

Me këtë fitore, Tottenham Hotspuri ka 17 pikë dhe qëndron në pozitën e gjashtë në tabelë, ndërsa West Ham United qëndron në pozitën e 16-të me vetëm 13 pikë./arbresh.info/